Ish-ministri i Drejtësisë, Ylli Manjani theksoi sot se padia e bërë nga ana e Shoqatës së Gjyqtarëve në Gjykatën Kushtetuese nuk e rrezikon aspak zbatimin e reformës në drejtësi, veçanërisht Vettingun.
Manjani vuri në dukje se edhe nëse Gjykata Kushtetuese e pranon padinë e depozituar nga ana e Shoqatës së Gjyqtarëve, kjo nuk e cenon dot zbatimin e Vettingut.
“Padia nuk e rrezikon reformën në drejtësi dhe Vettingun. Padia nuk e rrezikon procesin e vettingut dhe nuk ndikon për procesin e integrimit. BE dhe SHBA kanë akses të plotë për procesin e Vettingut. Edhe sikur të pranohet nga Gjykata Kushtetuese padia, nuk mund të cenojë zbatimin e Vettingut. Nuk besoj se duhet të ndalim nëse fitojnë apo humbin gjyqtarët, por Vettingu duhet të fillojë të zbatohet sa më parë”, u shpreh Manjani në emisionin “Top Story” në Top Channel.
Duke iu referuar qëndrimit të kryeministrit Rama, sipas të cilit padia e kryer nga Shoqata e Gjyqtarëve është një puç që i bëhet reformimit të sistemit të drejtësisë, Manjani shpjegoi se vetë reforma e ndërmarrë nga qeveria aktuale shënon një faqe të zezë në sistemin gjyqësor.
“Rama po bën një faqe të zezë në reformimin e drejtësisë. Reforma në drejtësi i ka hequr çdo rol ministrit të drejtësisë”, theksoi Manjani.
Shoqata e gjyqtarëve me anë të një kërkese të dytë, kanë arritur të shfuqizojnë pjesërisht një numër nenesh nga ligji “Për statusin e gjyqtarëve dhe prokurorëve në Republikën e Shqipërisë” dhe vendimi në favor duket se i ka dhënë zemër shoqatave, që në kërkesën e tyre të fundit drejtuar Gjykatës Kushtetuese kanë shënjestruar zhbërjen e pjesshme të tre ligjeve të reformës.
