Policia ka proceduar penalisht gjashtë persona, të cilët në kundërshtim me masat e vendosura kanë organizuar grumbullime të jashtëligjshme.
Mësohet se mes 6 personave që procedohen penalisht është dhe ish-deputeti i PD-së, Ervin Salianji. Personat e tjerë të proceduar penalisht janë: Marjus Seitaj, 31 vjeç, banues në Berat, këshilltar pranë Partisë Demokratike; organizator i grumbullimit dhe Julian Gjini., 40 vjeç, banues në Divjakë, kryetar i Partisë Demokratike, dega Divjakë; organizator i grumbullimit.
Ndërkohë që nën hetim janë edhe tre shtetas të tjerë, shitës perimesh dhe fermerë.
Njoftimi i policisë:
Divjakë
Organizuan grumbullime të paligjshme në kundërshtim me masat e nxjerra nga organet shtetërore në gjendjen aktuale të epidemisë COVID-19, procedohen penalisht 6 shtetas, ndërmjet tyre 3 organizatorët e takimit.
Specialistët për Hetimin e Krimeve në Komisariatin e Policisë Divjakë proceduan penalisht shtetasit:
- S., 32 vjeç, banues në Tiranë, sekretar i Burimeve Njerëzore pranë Partisë Demokratike;
- S., 31 vjeç, banues në Berat, këshilltar pranë Partisë Demokratike;
- Gj., 40 vjeç, banues në Divjakë, kryetar i Partisë Demokratike , dega Divjakë;
- H., 39 vjeç, banues në Divjakë, shitës perimesh;
- H., 33 vjeç, banues në Divjakë, shitës perimesh;
- J., 50 vjeç, banues në Divjakë, fermer;
Ditën e djeshme, shtetasit E. S., M. S. dhe J. Gj., në rolin e organizatorëve, kanë shkuar pranë pikës së grumbullimit të perimeve në fshatin Mizë, Divjakë dhe kanë grumbulluar fermerë dhe banorë të zonës, duke mos zbatuar Aktin Normativ Nr. 3, datë 15.03.2020 i ndryshuar, si dhe ndryshimet e Kodit Penal të nxjerra nga organet shtetërore në gjëndjen aktuale të epidemisë COVID-19.
Materialet i kaluan Prokurorisë pranë Gjykatës së Shkallës së Parë Lushnjë, për veprën penale “Moszbatimi i masave të autoriteteve shtetërore gjatë gjendjes së masave të jashtëzakonshme apo gjatë gjendjes së epidemisë”, në ngarkim të shtetasve të lartëpërmendur, të cilët po hetohen në gjendje të lirë.
