Shoqata e Biznesit ka shprehur shqetësimin mbi orën policore në fuqi, pasi i privojnë në ushtrimin e aktivitetit. Me anë të një letre publike, Shoqata e Biznesit i kërkon Ministrisë së Shëndetësisë dhe Komitetit Teknik të Ekspertëve, që të rishikohen masat anti-COVID në vend.
Bizneset, që në krye të herës nënvizojnë se janë përballur me vështirësi ekonomike dhe se një ndikim të madh ka edhe ora policore.
Ndodhur në këto kushte, bizneset kërkojnë që të rishikohen masat në fuqi, duke marrë shkas edhe nga numri i ulët i rasteve me infektime nga koronavirusi.
Në një zë, bizneset thonë se goditja që kanë marrë gjatë një viti mbyllje dhe ora policore në fuqi, do i çojë drejt falimentit.
Letra
Referuar masave në fuqi të VKM dhe Komitetit Teknik të Ekspertëve në kuadër të pandemisë së Covid-19, kërkojmë lehtësira nga ju, pasi ne si biznese po përballemi me vështirësi ekonomike. Ora policore ende në fuqi, na privon nga aktivitetet që ne si biznese (lokale) zhvillojmë; (dasma, gëzime familjare e cermoni të tjera), duke na ushtruar presion të vazhdueshëm dhe nuk na lejojnë të zhvillojmë normalisht aktivitetin tonë ekonomik, brenda orarit të lejuar nga institucionet, çka na vështirëson së tepërmi ekonominë, gjë e cila reflektohet edhe te të ardhurat familjare të çdo drejtuesi biznesi.
Për këtë arsye kërkojmë të rishikohen masat në fuqi, duke patur parasysh edhe numrin e ulët të rasteve me infektime nga covid 19, ashtu sikurse edhe vdekshmërinë. Goditja që kemi marrë nga një vit mbylljeje për shkak të pandemisë së covid 19, dhe orës policore ende në fuqi, do të na e vështirësojë akoma dhe më shumë ekonominë dhe financat, duke na çuar drejt falimentit. Është e udhës të gjendet një zgjidhje dhe reagim sa më i shpejtë nga ana juaj, në te kundërt edhe ne referuar rregullave e ligjeve në fuqi do të reagojmë. Duke ju falenderuar, Shoqatat e bizneseve.
Më herët, disa biznesmenë në Vlorë protestuan për orarin e kufizimit. Ata paralajmëruan se nëse nuk do të ketë një reagim nga qeveria, nga java e ardhshme mund të mbyllin bizneset e tyre.
