Rudina Hajdari, kryetarja e Komisionit Parlamentar të Integrimit, në seancën dëgjimore me Komisionin për Çështjet e BE në parlamentin e Holandës tha se opozita parlamentare mendon se Shqipëria e meriton hapjen e negociatave në qershor.
Hajdari tha se hapja e negociatave është e rëndësishme për destinacionin europian të vendit tonë dhe se do t’i japë impulse të reja bashkëpunimit të Shqipërisë me Holandën dhe vendet e BE-së në luftën kundër krimit të organizuar, trafiqeve dhe korrupsionit.
“Si anëtare e NATO-s prej dhjetë vjetësh, Shqipëria është një faktor stabiliteti, sigurie e paqeje në rajon e më gjerë. Hapja e negociatave është e rëndësishme për të mos braktisur orientimin dhe destinacionin europian të Shqipërisë dhe Ballkanit Perëndimor. Jo vetëm Qeveria, por edhe opozita parlamentare mendon se Shqipëria e meriton hapjen e negociatave në qershor”, deklaroi Hajdari.
