Tubimi i djeshëm është karakterizuar nga dhuna, flaka, përplasjet dhe kaosi. Protagonistët kanë qenë protestuesit e opozitës, të cilët kanë sulmuar dhe dhunuar institucionet e shtetit, përfshi këtu edhe mediat.
Si pasojë e dhunës së ushtruar nga protestuesit, u dhunuan 3 grupe xhirimi të televizioneve “Top Channel”, “ABC News” dhe “Report TV”. Po ashtu, pre e dhunës së protestuesve të opozitës ranë edhe disa gazetarë, të televizionit “Top Channel” dhe “Report TV”.
Për rrjedhojë, dy gazetarë u dhunuan edhe gjakosën. Protesta nisi tek Kryeministria rreth orës 18:30 dhe pas 2 orësh u zhvendos tek Parlamenti, ku situata degjeneroi në dhunë.
Protestuesit sulmuan me bomba molotov në drejtim të Kuvendit, ku për pasojë flakët përpinë gardhin para. Të ndodhur përpara kësaj situate, policia nisi të hedhë gazlotsjellës, duke shpërndarë turmën. Në të njëjtën kohë, në ndihmë të uniformave blu shkuan autobotet me ujë, ku u bë e mundur që të “shkatërrohej” dhe të zmbrapsej turma e protestuesve.
