RENEA dhe FNSH-ja gjatë orëve të para të mëngjesit të sotëm kanë zhvilluar një operacion blic në qytetin e Elbasanit. “Report Tv” raporton se mbi 50 persona janë shoqëruar për në rajonin e Policisë, mes tyre janë edhe disa pjesëtarë të fisit Çapja.
Për të paktën 7 prej tyre kërkohet arrestimi, ndërkohë vlen të theksohet fakti se në kuadër të operacionit në fjalë janë arrestuar edhe dy gazetarë të cilët punonin në administratë në Tiranë. Pas kontrollit të imtësishëm të banesave është shoqëruar në polici edhe Ardjan Çapja dhe disa persona të tjerë që janë të afërm të tij.
Operacioni ka nisur në orën 03:00 të mëngjesit dhe ka zgjatur deri në 09:00, ndërsa policia e Elbasanit është mbajtur larg për shkak të frikës nga dekonspirimi. Blutë e Elbasanit janë njoftuar vetëm pasi RENEA e mbështetur nga FNSH-ja kishte nisur shoqërimet.
Por kush është Ardjan Çapja?
Ardian Çapja është një emër i njohur në qytetin e Elbasanit, por edhe për drejtësinë, pasi ka qenë shoqëruar disa herë, ndërsa në vitin 2017 u ka shpëtuar dy atentateve me armë dhe eksploziv. Ai është pronari i hotel Univesit në hyrje të qytetit të Elbasanit. Ardian Capja është vëllai i Sokol Capja, që u ekzekutua në vitin 2005. Si pasojë e përplasjes dhe hasmërisë mes fisit Çapja dhe Mema në dekadën e fundit në Elbasan janë shënuar shumë viktima nga të dy palët, ndërsa shumë ngjarje janë ende pa autorë, raporton Shqiptarja.com.
