Kombet e Bashkuara kanë bërë apel për mbledhjen e 10.3 miliardë dollarëve, për të ndihmuar në luftën ndaj pandemisë.
Organizata paralajmëron se deri në 265 milionë njerëz mund të përballen me urinë deri në fund të vitit, për shkak të pasojave që mund të sjellë virusi. Sipas tyre, paratë do të shfrytëzohen për vende me të ardhura të ulëta dhe të brishta.
Në apelin e parë për koronavirusin, në muajin mars, ata bënë thirrje për dy miliardë dollarë. Apeli i rishikuar është rekord, por, sipas OKB-së, vendet e pasura duhet t’i ndihmojnë të varfrat. Nëse jo, bota përballet me një seri krizash, përfshirë miliona njerëz të uritur, paralajmëroi OKB-ja.
Pandemia e koronavirusit ka bërë që në shumë vende të zvogëlohet prodhimi dhe të bie ekonomia, për shkak të masave të detyrueshme të izolimit.
Rreth 14 milionë njerëz nga e gjithë bota janë prekur nga koronavirusi, ndërsa më shumë se 592 mijë persona kanë humbur jetën.
