Seanca e djeshme në Kuvend ishte me akuza e kundër-akuza të forta. Kryeministri Rama u përfshi në një debat të fortë me kreun e “Foltores”. Përplasja e fortë mes Berishës dhe Ramës nisi për rezolutën e Kosovës. Rama tha në fjalën e tij se Berisha nuk i shpëton dot historisë, duke e akuzuar se ka privatizuar Shqipërinë, ka dërguar naftë në Serbi dhe ka shpallur terrorist Hashim Thaçin. “Historia të del përpara. Ju thotë jeni të padëshirueshëm. Mbaroj historia jote, ik tani! Çoi naftë Millos atje. E bëtë Hashim Thaçin terrorist. Ktheve Shqipërinë në pronë private, por të vjen historia përpara. Ja si vjen, si nisi kjo punë. Paska nis nga Kremlini dhe na e paskan votuar këta. Asnjë fjalë për Dick Martyn. Ju jeni gati të shkoni në Këshill të Evropës të thoni shqiptarët janë mafie”, u shpreh Rama.
Kreu i qeverisë e paralajmëroi Berishën se do të shpallet “Non Grata” nga britanikët. “Ndërkohë që ju përpiqeni ta shpëtoni, dilni “Non-Grata” dhe të padëshirueshëm. Oqeanin e harruan disa, do harroni edhe Gibraltarin, dhe shumë shpejt do harroni dhe Adriatikun, mua më dalin fjalët. Së shpejti vjen gjëja, opa afrohet dhe pastaj vjen këtu. Ju do luftoni për sovranitetin për ta përdorur flamurin e Shqipërisë si leckë si gjethe fiku”, tha Rama.
Edhe pse me mikrofon të fikur, ish-kryeministri Berisha replikoi me Ramën duke e akuzuar se është hajdut ikonash në Paris dhe e ka nisur karrierën si hajdut ordiner “kur ky hallazi 2 metra i gjatë shiste ikona të vjedhura, Kosova mbulohej me gjakun e bijve të saj, kur ky mbahej me ikonat e vjedhura që shiste në Paris”, tha Berisha.
Kreu i PD-së i shkoi kryeministrit te karrigia në podium, pasi kryetarja e Parlamentit Lindita Nikolla nuk i ka dhënë fjalën. Para i kanë dalë gardistët. “S’ke turp o frikacak, o i pafytyrë. O burracak, o i panderë. Ty të ka çmendur 7 korriku”, i tha Berisha-Ramës.
Kur gardistët i dolën para, Berisha iu drejtohet; “nuk e rrah jo!”
Nikolla i mbylli mikrofonin, replika e Berishës për Ramën që nuk u dëgjua nga mediat
Kreu i PD-së Sali Berisha ka kërkuar fjalën dhe ka zënë foltoren e Kuvendit për t’iu përgjigjur kryeministrit Edi Rama, por kryetarja e Parlamentit Lindita Nikolla i mbylli mikrofonin.
“Kur ky hallaci 2 metra i gjatë shiste ikona të vjedhura në Paris, Kosova mbulohej me gjak. Kosova mbulohej me gjakun e bijve të saj. Kur ky shiste ikona të vjedhura në Paris, mbahej me ikonat e vjedhura, në sarajet e Surrelit ka ikonat e vjedhura. Shkoni pyesni Fatos Nanon.
Kur ky dymetroshi është siç është, mund ti them shumë fjalë, por nuk dua, i them vetëm kaq: kur djemtë e Kosovës derdhnin gjak ti shisje ikonat e vjedhura dhe spiunoje emigrantët në Paris. Po, po. Kur Partia Demokratike shpallte moton “një komb një qëndrim” dhe mbështeste UÇK, ti shisje ikona të vjedhura o mjeran. Edhe çdo kurorë po more, përsëri mbetesh një hajdut ordiner që e nise jetën tënde duke shitur ikona të vjedhura”, ka deklaruar Berisha duke iu drejtuar Ramës, i cili hodhi akuza të ashpra ndaj tij dhe opozitës.
Edi Rama: Je i vetmi hajdut i certifikuar.
Lindita Nikolla: Fjalën e ka zoti Mediu.
