Dje ministri Drejtësisë foli dhe për miratimin e Hartës Gjyqësore në Këshillin e Ministrave, dhe u shpreh se kjo është zgjidhja më e mirë për sistemin e drejtësisë. Sistemi gjyqësor do të funksionojë me 16 Gjykata në total, 12 të Shkallës së Parë, 1 Gjykatë Apeli dhe 2 Gjykata Administrative. Këshilli i Ministrave miratoi këtë të enjte hartën e re gjyqësore, vendim që shkrin 20 Gjykata në vend dhe sipas ministrit të Drejtësisë, Ulsi Manja, procesi për vënien në funksion të saj do të nisë në shkurt 2023. Miratimi i hartës së re, u përshëndet edhe nga Këshilli i Lartë Gjyqësor. Sakaq, avokatët u shprehën sërish kundër hartës gjyqësore dhe në mbledhjen e Dhomës Kombëtare të Avokatisë, kreu i saj, Maksim Haxhia tha se do e çojnë në Kushtetuese për cenim të aksesit në drejtësi.
“Harta e re gjyqësore kaloi sot në qeveri dhe kam dosjen e plotë të hartës së re. Dua të falenderoj KLGJ për punën 3 vjeçare, e para në llojin e vet me një grup ekspertësh, të asistuar nga ekspertët më të mirë të Këshillit të Europës por edhe me një ndihmë teknike nga SHBA-ja, që gjatë 3 viteve, nga nëntori 2019 finalizuan hartën e re gjyqësore, një produkt i sistemit gjyqësor.
Ministria e Drejtësisë në referencë të ligjit 98/2016 është përfshirë që ditën e parë deri te bashkëpropozimi që u votua sot. Është ekzekutivi që do të japë mbështetjen për buxhetimin e hartës dhe logjistikën për të garantuar mirëfunksionimin e sistemit gjyqësor. I kam dëgjuar të gjitha shqetësimet, por dua të bëj të qartë se harta e re nuk do të cënojë asnjë shërbim për qytetarët në vendet ku gjykatat do mbyllen.
Shërbimet gjyqësore do të jetë aty. Më 1 shkurt Gjykatat e Apelit, më 1 maj Gjykatat e Shkallës së Parë të Juridiksionit të Përgjithshëm dhe më 1 korrik Gjykatat e Apelit të Shkallës së Parë. Në varësi të numrit të gjyqtarëve që do kemi, ligji ka krijuar mundësinë e krijimit të degëve të gjykatave nëse do ketë shtim të volumit çështjeve.
Të japim kontributin për implementimin e hartës dhe ta shfrytëzojmë këtë periudhë tranzitore për edukimin e qytetarëve me familjarizimin e hartave të reja”, tha ai.
Harta e re është miratuar, pa marrë parasysh bojkotin e avokatëve që vazhdon prej disa javësh. Aktualisht Shqipëria ka 6 Apele në të gjithë vendin dhe reduktohet në një Apel kombëtar ndërsa 13 do të jetë numri Gjykatave të Shkallës së Parë nga 22 që është aktualisht. Me vendimin e ri shkrihen gjykatat në Tropojë, Krujë, Lushnje, Pogradec, Mat, Përmet, Kurbin, Kavajë, Pukë. KLGJ miratoi draftin më 10 qershor dhe i vetmi ndryshim nga propozimi i mëparshëm ishte shtimi i një Gjykate e Shkallës së Parë në Sarandë.
