Kryetarja e Kuvendit të Kosovës në detyrë, Vjosa Osmani dhe deputetja e LDK-së, Donika Gërvalla janë përzënë me forcë nga mbledhja e sotme e LDK-së.
Kjo vjen pas kundërshtimit që Vjosa Osmani bëri mbrëmjen e djeshme, ku votua mocioni i mosbesimit për kryeministrin Albin Kurti.
Gjatë fjalës së saj në Kuvendin e Kosovës, Osmani doli kundër rrëzimit të qeverisë së Kurtit, teksa dha indicie se edhe mund të largohej nga LDK.
Ajo përmendi mbrëmë faktin se në jetën e saj mund të ketë një dritare të re politike.
Mocioni i mosbesimit ndaj Qeverisë Kurti u votua me 81 vota pro, 32 kundër dhe 1 abstenim.
Qeveria e Albin Kurtit e drejtoi ekzekutivin për vetëm 51 ditë, duke u bërë qeveria më jetëshkurtër ndonjëherë në Kosovë.
Mocionin e mosbesimit e nisi Lidhja Demokratike e Kosovës, e cila ishte në koalicion me Lëvizjen Vetëvendosje.
Por ky koalicion u prish në momentin kur Kurti vendosi të shkarkonte pa paralajmërim ministrin e Punëve të Brendshme, Agim Veliun.
