Teksa shtetet e tjera evropiane po shohin një përmirësim të situatës nga koronavirusi, nuk duket të jetë ky rasti edhe për Mbretërinë e Bashkuar.
Vendi vijon të raportojë numrin më të madh të viktimave në Evropë brenda një dite. Në 24 orët e fundit, në Mbretërinë e Bashkuar janë regjistruar 414 viktima, duke e çuar në 31,029 numrin total të viktimave.
Britani tashmë mban vendin e parë në Evropë për numrin më të madh të viktimave nga COVID-19, duke ia kaluar edhe Italisë që e mbante këtë rekord që nga shpërthimi i pandemisë në këtë kontinent.
Ndërkohë raportohet se në mesin e viktimave që u shënuar në 24 orët e fundit, të ketë qenë edhe një foshnje vetëm 6 javëshe. Kjo është viktima më e re që është regjistruar në MB, ndërsa mjekët kanë sqaruar se foshnja vuante edhe nga sëmundje të tjera.
Me mbi 206 mijë raste të reja, Mbretëria e Bashkuar renditet e katërta në botë për numrin më të madh të rasteve me koronavirus.
