Kryetarja e LSI-së Monika Kryemadhi pak më parë iu bashkua protestës kombëtare të opozitës që po mbahet në këto momente.
Kryemadhi u shpreh për mediat se protestat nuk do të mbarojnë, derisa t’ia arrijnë qëllimit të tyre dhe bën thirrje që këto protesta mos të quhen më të opozitës, por të gjithë shqiptarëve.
“Protestat nuk do të mbarojnë deri sa të mbyllet kjo vuajtje e jashtëzakonshme. Problemi nuk është te metodat, vjen te mënyra në të cilën është organizuar struktura kriminale e Ramës. Me procesin farsë mori goditjen ballore, dhe ndërkohë kemi një varfëri të jashtëzakonshme, një largim në masë të të rinjve. Janë protesta të shqiptarëve, protestat janë për të zgjidhur përfundimisht tranzicionin. Nuk ka bërë vaki që ky reagim qytetar i Shqipërisë, këtë reagim kaq të madh Shqipëria e ka pasur vetëm në vitet ’90 kur u ngritën kundër regjimit”, u shpreh Kryemadhi.
Ajo mori kohën edhe për të komentuar votimin në parlament për ngritjen e komisionit hetimor parlamentar, për presidentin Meta.
“Është një parlament që vjen si rezultat i parave të krimit. Sot shqiptarët nuk kanë hallin e karriges së Metës, të gjithë thërrasin se duan punë, taksa të ulëta, BE, me këtë qeveri Shqipëria nuk do jetë kurrë në BE, Rama po e çon vendin drejt një izolimi total. Kapja e reformës në drejtësi, e ekonomisë shqiptare për ta kthyer në lavatriçe të parave te pista e drogës, dhe këtë se thotë opozita por ndërkombëtarët”, tha ajo.
