Kryeministri Edi Rama ka debatuar dje ashpër me analistët Agron Gjekmarkaj dhe Enton Alibekaj. Mollë sherri është bërë ish-kryeministri Sali Berisha, të cilin Rama e quajti “mbetje organike e pariciklueshme që qelb dhe qelbet”.
Pjesë nga debati
Rama: Mos më ndërhy kur flas unë. Lideri juaj shpirtëror është mbetje e pariciklueshme.
Por teksa tonet mes palëve u nxehën, kreu i qeverisë kërkoi që analistëve t’iu hiqej e drejta e fjalës. Në të kundërt, ai do të largohej nga studioja. Rama tha se është i vetmi kryeministër në botë, që lufton për të marrë të drejtën e fjalës.
“Unë nuk komunikoj dot kështu, nuk komunikoj dot. Jam i vetmi kryeministër në botë që luftoj për të marrë fjalën sa herë që rrethohem nga gazetarët, jam i vetmi. Nuk flas fare, mbylle të ikim në shtëpi. Nuk ndërtoj dot dy fjali unë kështu. Nuk përgjigjem, nuk flas”, tha Rama.
Duke marrë shkas nga përgjigjja e Ramës, moderatorja e emisionit Eni Vasili u detyrua që të fuste reklama, deri sa palët ti riktheheshin normalitetit.
