Shumë është aluduar kohët e fundit për shëndetin e kryeministrit Rama, e ndërsa kreu i qeverisë prej ditës së djeshme ka qenë në Paris, ndërsa sot ai gjendet në Berlin. Takimet intensive kanë në fokus integrimin në Bashkimin Evropian.
Sinjalet kanë qenë pozitive dhe mbështetëse nga shumë ndërkombëtarë, por shefi i mazhorancës shqiptare duket se po bën lëvizjet e tij, për të lobuar drejt një hapi të madh për Shqipërinë, siç është fillimi i bisedimeve për anëtarësim në BE. Kryeministri mësohet se do të kthehet sot në Shqipëri.
Burime nga selia e Kryeministrisë thonë se shefi i qeverisë ka shkuar “për takime” në dy kryeqendrat evropiane, por pa sqaruar se për ç’lloj takimesh bëhej fjalë.
Fundjavën e kaluar, ish-deputeti i PD, Klevis Balliu, nxori në publik faktin se kryeministri kishte shkuar në spital, por një gjë e tillë u hodh poshtë nga vetë kryeministri, me anë të reagimit në rrjetet sociale.
Po ashtu, në Tiranë mungoi sot edhe kryedemokrati Basha, i cili nuk drejtoi protestën e radhës kundër qeverisë. Ai ndodhet në Bruksel.
