Pedagogu i ekonomikut, Rezart Prifti i ftuar në emisionin “Ekopolitikë’ u shpreh se fillimisht jemi një shoqëri e korruptuar, më pas një shtet i korruptuar.
Prifti tha se korrupsioni në Shqipëri është një problem kulturor, ndërsa theksoi se në vendin tonë nuk e sheh si një fenomen të keq, pasi me nivelin e rrogave këtu mbetesh “beqar dhe pa shtëpi”.
“Ne jemi një shoqëri e korruptuar pastaj shtet i korruptuar.Korrupsioni në vende si puna e këtij tonit është si puna e grasos, bën punë.Në Shqipëri nuk e shoh të keq korrupsionin.
Nëse ti do të punosh te Ministria e Financave dhe do marrësh 420 mijë lekë dhe pas 5 vjetësh të marrësh 520 mijë lekë dhe pastaj 600 mijë lekë. I bie të mbetesh i pa martuar pas 10 vitesh se me 600 mijë lekë ti as nuse nuk bën dot, as shtëpi nuk gjen dot, jo bukë të hash dhe të blesh ndonjë makinë. As biçikletë nuk blen dot”, deklaroi pedagogu.
Por, akoma më shqetësuese pedagogu sheh shqiptarizimin e të huajve në momentin kur ata vijnë në vendin tonë.
“Korrupsioni po vjen jo vetëm nga familjet e njerëzve por po vjen dhe nga të huajt.Kjo ka qenë gjëja më e keqe që nuk e kam pritur ndonjëherë. Të arrijë që çdo i huaj që vjen këtu të shqiptarizohet kjo është e frikshme”, tha Prifti.
Madje pedagogu nuk nguroi të deklarojë se PNUD u mësoi si bëhet korrupsioni organizatave lokale në vend.
