Kryeministri Edi Rama ka vizituar pasditen e sotme familjen e të ndjerit Klodian Rasha, i cili u qëllua për vdekje nga efektivi i “Shqiponjave”, Nevaldo Hadëraj.
Mësohet se Rama i ka shprehur ngushëllimet familjes, duke i siguruar për mbështetjen e tyre të plotë. Ndërkohë, familjarët i kanë kërkuar që të vihet drejtësi dhe të zbardhet e vërteta e ngjarjes.
Pas kërkesës së familjarëve, Rama ka shtuar se do të qëndonte pranë tyre, pasi mezi priste që të kthehej nga Amerika për t’i takuar, edhe pse kishte frikë se ata nuk do e pranonin.
“Neve na keni pranë, unë jam shumë i pikëlluar nga kjo që ka ndodhur, është një fatkeqësi. Prokuroria do ta zbardhë të vërtetën. Mezi kam pritur që të vija. Nuk më zinte vendi. Sapo kam ardhur dhe nuk e dija nëse do më pranonit për ngushëllim, sepse kam pasur dëshirë të vij vetë personalisht”, mësohet të ketë thënë Rama.
