Ish-kreu i Grupit Parlamentar të PD-së, Edi Paloka i ka konsideruar arrestimet e protestuesve të opozitës në Librazhd një “çmenduri të kryeministrit”.
I ftuar në “News24”, Paloka bëri përgjegjës kryesor për situatën në të cilën ndodhet vendi kreun e qeverisë, ndërsa u shpreh se ky i fundit kërkon të shkelë popullin me këmbë.
“Arrestimet e fundit janë shkelje e ligjit nga Edi Rama. Më datë 30 qershor, nuk e kemi me popullin, e kemi me atë, Ramën. Ia thanë edhe dje, ia tha Pandeli Majko në parlament. Rama kërkon të shkelë popullin me këmbë. S’mund të çojmë popullin në gjak pse ka lajthitur Rama. Vendi po rrezikon demokracinë”, tha Paloka.
Po ashtu, Paloka shtoi më tej se protestat e organizuar nga opozita jo parlamentare nuk kanë përfunduar ende, teksa njoftoi se ditën e sotme do të zhvillojnë një mbledhje, ku do të vendosin për datën e radhës të protestës.
“Protestat jo vetëm nuk do të ndalen, por do të intensifikohen. Sot ne kemi mbledhje të tjera për të vendosur pikërisht për protestën tjetër. Është diskutuar njëherë me aleatët dhe besoj se do të vendoset data. Për datën e protestës do të mblidhemi”, u shpreh Paloka.
