Nga foltorja e Kuvendit dhe me tone të larta, deputeti i opozitës Lefter Maliqi ka kërkuar dorëheqjen e kryeministrit Edi Rama. Tashmë që organet e reja të drejtësisë janë drejt përfundimit, ai ka kërkuar që SPAK-u dhe BKH-ja të hetojnë mbi korrupsionin qeveritar, lejet e ndërtimit, oligarkët dhe pasojat e tërmetit. Sipas tij, këta ata duhet të shkojnë në burg.
“Nëse nesër do të binin në muret e Kuvendit, kot nuk thotë populli është ajo shprehja nuk bie rrufeja në pikë pikë pikë. SPAK dhe BKH duhet të nisë hetimet sepse kjo është vrasje me paramendim. Të lirohen burgjet nga ata që kapen me 30 gramë hashash dhe të mbushen me oligarkët dhe ata që japin lejet e ndërtimit.
Dhe vinë këtu dhe derdhin lot, pse për lot është këtu? Unë vetëm të jap shpirtin, po këta kanë shumë pasuri. Vetë kryeministri ngre fëmijët në ajër, ironi me qytetarët, nuk i jep dorën Gjovalin Gjokës, shtyn zëvendësin e tij, bën sikur vdes me atë mjekrën e tij. Nëse ai ka moral, të japë dorëheqjen. Po nuk i ra tërmeti në kokë nuk ikën”, u shpreh Maliqi.
Gjatë fjalës së tij, Maliqi është ndalur edhe te emërimi i Bledi Çuçit si ministër drejtues për shtabet e emergjencës. Sipas tij, Rama bën show politik.
“Pse more ka rënë ndonjë pulari? Ku janë more ata? Ku janë ata që kanë eksperiencë? Tersin e keni këtu mbrapa, atë që e vodhi këtë vend. Nuk e dimë ku i kanë mbyllur pasuritë, në Qipro e në Zvicër. Vijnë këtu dhe bëjnë show. Këta bën tërmet në drejtësi dhe gjykata. Kurrë mos paça të ardhur politike, po jo si këta. Dhe qajnë këta pasi bie tërmet, sepse e quajnë Baba Xhike presidentin kur paralajmëroi me letra nga greku”, theksoi deputeti Lefter Maliqi.
