Nga Camilla Cupelli,“La Stampa”/Përshtati për Tirana Today, Alket Goce
Borgosesia-Në Valsesia, një zinxhir piktoresk luginash alpine në Italinë veriperëndimore, kanabisi ka qenë një kulturë tradicionale prej më shumë se 5 mijë vjetësh. Të dhënat e para të kultivimit, datojnë që në vitin 3.500 P.E.S, ndonëse kjo praktikë u braktis në masë të madhe gjatë shekullit XX-të.
Disa vite më parë, u formua një shoqatë lokale “Canapa Valsesia”, për të nxitur kultivimin e kanabisit në luginën që ndodhet në rajonin veriperëndimor të rajonit të Piemontit. “Është një lloj mënyre për të kthyer vëmendjen ndaj tokës”- thotë Francesco Cillerai, një 27-vjeçar i diplomuar për shkenca politike, që ngriti një ndër fermat e para të kultivimit të kanabis sativës në zonë.
Shumëllojshmëria e lëndës narkotike që kultivohet këtu dhe kudo në Itali, ka një nivel të ulët THC-je, një përbërës psikoaktiv i marijuanës, e cila është e destinuar të përdoret si një bimë dekorative apo për produktet e kërpit.
“Ne u krijojmë bizneseve dhe kultivuesve private, mundësinë për të provuar kultivimin e kanabisit në vendin e tyre”- thotë Simona Brini, presidente e “Canapa Valsesia”, e cila është pjesë e një shoqate më të madhe, me anëtarë nëpër gjithë zonat alpine italiane, e quajtur “Canapa Alpina”. “Ne blejmë farëra të varieteteve të ndryshme, dhe ua japim ato kultivuesve në fshat, që duan të eksperimentojnë me to”.
Ndërsa kultivimi i kanabisit po përhapet në mbarë vendin, shumica e saj është eksperimentale, dhe nuk ka një treg të vërtetë. Më shumë se gjysma e 20 rajoneve të Italisë, kanë miratuar ligje që lejojnë konsumin e kanabisit për qëllime mjekësore, dhe një propozim në nivel kombëtar ka marrë mbështetje në parlamentin italian.
Për shkak se kanabisi medicinal, mund të kultivohet vetëm nga agjencitë qeveritare, ligjet në ndryshim e sipër, nuk do të ofrojnë një treg të ri për kultivuesit. “Ne u japim bimë dhe farëra falas, cilitdo që dëshiron të kultivojë vetë kanabisin. Kanabisi është rritur këtu që nga Epoka e Bronzit”- thotë Cesare Quaglia nga “AssoCanapa”, një shoqatë tjetër e kultivuesve të kanabisit në rajon. Ajo është themeluar në vitin 1997, në të njëjtin vit kur Quaglia filloi të kultivonte vetë bimën narkotike.
“Kultivimi u zhduk në vitet 1940-1950, por një bum i ri nisi në vitin 2013. Në vitin 2017, hektarët e kultivuar me kanabis në këtë rajon, pothuajse u dyfishuan”. Cillerai thotë se ai filloi të kultivojë marijuanën, si një mënyrë për t’u “rikthyer në origjinën time”. Një vit më vonë, ai themeloi “Canapa Valsesia”, edhe pse nuk ka shitur ende në treg ndonjë pjesë të kanabisit që zotëron.
Korrja e parë e “CanapaValsesia” ndodhi në muajin gusht, duke i lejuar kultivuesit të eksperimentojnë më tej me kulturat e vitit të ardhshëm. “Ne kemi një hektar me tri lloje të ndryshme kanabisi të mbjellë në lartësi të ndryshme. Kështu mund të kuptojmë se cili është varieteti më i mirë”- thotë Cillerai.
Qëllimi i tij është të krijojë zinxhirë lokalë të furnizimit, dhe të ringjallë një traditë të lashtë. Një shembull është “B & F Holyweeds”, një biznes lokal që shet bimë kanabisi për qëllime zbukuruese. Gjetiu në Alpet italiane, “Canapa Alpina” po kërkon të testojë prodhimin e litarit të kërpit dhe produkteve të kuzhinës.
Në luginën Anzasca, disa gra kanë filluar të prodhojnë pantofla tradicionale duke përdorur litarin e kërpit, thotë Brini. Sipas “AssoCanapa”, në Piemonte ka mbi 200 hektarë tokë të kultivuar me kanabis sativa. Organizata mbledh së bashku 84 kultivues, duke përfshirë 80 biznese bujqësore, 3 organizata jofitimprurëse dhe një fermë. “Ka ferma të vogla në rritje në disa lugina në Piemonte”- thotë presidentja e “AssoCanapa” Margherita Baravalle. “Ne e kemi thënë prej vitesh, se kultivimi i kanabisit mund të kontribuojë në ringjalljen e qytezave tona malore”.
Përshtati për Tirana Today, Alket Goce
