Përkeqësohet bilanci nga koronavirusi në Shqipëri. Mësohet se mëngjesin e sotëm ka ndërruar jetë një tjetër pacient që ishte infektuar me koronavirus.
Bëhet me dije se viktima është një 79-vjeçar i cili ishte shtruar tek spitali infektiv në Tiranë.
Lajmin e ka njoftuar këtë paradite drejtoresha e ISHP-së, e cila ka dhënë edhe detaje për rastin në fjalë.
“Mëngjesin e sotëm ka ndërruar jetë në spitalin Infektiv një pacient 79-vjeçar nga Tirana, i konfirmuar me COVID-19.
79-vjeçari me inicialet B.H. ishte prej 18 ditësh i shtruar në spitalin infektiv. I moshuari ishte përmirësuar ditët e fundit por ndërroi jetë nga një infarkt kardiak. 79-vjeçari është viktima e 11 e prekur nga COVID-19 në Shqipëri. Ministria e Shëndetësisë i shpreh ngushëllimet familjes së të ndjerit”, tha ajo.
Numri i viktimave të shkaktuara nga koronavirusi në Shqipëri shkon në 11. Ndërkohë ditën e sotme janë shënuar edhe 11 raste të reja me Covid-19, duke e çuar në 223 numrin total të rasteve.
