Koordinatori i Bindjes Demokratike, Astrit Patozi, ka përcjellë një mesazh mjaft të fortë lidhur me pasojat e tërmetit fatal për Shqipërinë. Ai e nis që në krye të herës, me një apel të fortë se ishte një tërmet që mund ta kishim evituar.
Duke bërë një pasqyrë të përgjithshme të asaj që përjetuam, ai bën një paralelizëm me shoqëritë e zhvilluara. Për të, shoqëritë e avancuara, nuk presin asnjëherë që të bien tërmetet për t’u shkundur.
Në këtë tronditje fatale që mori shoqëria shqiptare, Patozi nuk nguron që të thumbojë edhe klasën politike. “Një goditje tjetër që po kalojmë pas 26 nëntorit, është gara e shpifur për klikime sot, apo vota nesër mes atyre, të cilët më shumë se kushdo tjetër në këtë vend duhet të ulnin kokën e të kërkonin ndjesë”, shkruan më tej ai.
Statusi
NJË “TËRMET”, QË MUND TA KISHIM EVITUAR
Shoqëritë e avancuara nuk presin asnjëherë që të bien tërmetet për t’u shkundur. Ato përgatiten t’i presin fatkeqësitë, duke u vetëlëkundur në çaste dhe në kohë normaliteti. Prandaj edhe nuk mbyten kurrë në një pikë ujë, kur tragjedia një ditë vjen.
Tek ne as që bëhet fjalë të ndodhë kjo, sepse nuk kemi asnjëherë kohë të mendojmë për të ardhmen, ngaqë jemi shumë të zënë për të mbyllur llogaritë e së tashmes. Të cilat gjithmonë dhe pa asnjë përjashtim firmosen sipas parimit “ai që ka topin, gjuan edhe penalltinë”.
Pikërisht për këtë arsye, një goditje tjetër që po kalojmë pas 26 nëntorit është gara e shpifur për klikime sot apo vota nesër mes atyre, të cilët më shumë se kushdo tjetër në këtë vend duhet të ulnin kokën e të kërkonin ndjesë. Qoftë duke heshtur apo edhe duke u lutur sinqerisht një herë të vetme në jetën e vet për viktimat e pafajshme të babëzisë, papërgjegjshmërisë dhe paaftësisë së tyre në gjithë këto vite.
E njërës palë, që po përpiqet më kot të na bindë se duhet t’i falemi Zotit për këtë qeveri, se ndryshe nuk do ta kishim përballuar dot të keqen, por edhe të tjerëve, që gati po na thonë se këtë tërmet e porositi vetë qeveria. Këtë “tërmetin” e fundit, të paktën, mund ta kishim evituar…
