Presidenti Ilir Meta vlerëson me titullin “Mjeshtër i Madh”, atleten e njohur Luiza Gega.
Përmes një postimi në Facebook, Meta shprehet se Gega është një nga sportistet më të shquara në të gjithë historinë e Atletikës në Shqipëri.
“Sot pata kënaqësinë të vlerësoj me Titullin “Mjeshtër i Madh”, një nga sportistet më të shquara në të gjithë historinë e Atletikës shqiptare, Luiza Gega. Një sportiste e përmasave botërore si Luiza, është nder dhe krenari për të gjithë ne! Atletika, shumë e rëndësishme për të gjitha sportet e tjera! ”, shkruan Meta.
Kujtojmë se Luiza Gega bëri histori në Atletikën shqiptare, pasi u bë e para shqiptare e cila u kualifikua në një finale të Botërorit të Atletikës.
Gega u rendit e nënta në garën 3000 metra me pengesa, në kompeticionin e zhvilluar një muaj më parë në Katar. Ajo regjistroi kohën 9 minuta, 19 sekonda e 93 të qindtat, duke vendosur kështu rekordin e ri kombëtar.
