Klodian Rasha është qëlluar me dy plumba. Kështu thuhet në dosjen e përgatitur nga Prokuroria e Tiranës, për vrasjen e 25 vjeçarit në Laprakë, dy ditë më parë nga një efektiv i skuadrës Shqiponja.
Nga hetimet ka dalë se nga arma e efektivit Nevaldo Hasanaj janë qitur dy plumba. Plumbi i parë e ka kapur të riun në shpatull, në anën e djathtë, dhe i ka dalë në pjesën e zemrës. Për shkak se predha e plumbit ka prekur një prej arterieve kryesore, 25-vjeçari ka ndërruar jetë në vend.
Nga arma e efektivit është qitur dhe një plumb tjetër i cili nuk ka goditur drejtpërdrejt Klodian Rashën por ka bërë rikoshet në mur dhe më pas e ka kapur në pjesën anësore të kokës. Vdekjen në vendngjarje të të riut e kanë konfirmuar dhe regjistrat e spitalit të Traumës ku 25-vjeçari u dërgua me ambulancë nga dy efektivët që e ndoqën.
Mjekët e këtij spitali kanë regjistruar aktin e vdekjes së të riut në orën 01.23 minuta të datës 8 dhjetor. Sipas tyre, Klodian Rasha ka mbërritur i vdekur dhe ata nuk kanë pasur asnjë mundësi për të dhënë ndihmën e parë.
Klodian Rasha është ekzekutuar këtë të martë, 8 dhjetor, nga një efektiv policie. Ngjarja ka ndodhur në zonën e Laprakës në kryeqytet, pasi i riu kishte dalë orët e para të mëngjesit jashtë banesës së tij, duke thyer orën policore.
Policia shprehet se Rasha ka kërcënuar efektivin e policisë, ndaj ai ka qëlluar në kushtet e vetëmbrojtjes dhe në errësirë. Por, ndryshe thonë familjarët dhe fqinjët të cilët shprehen se rruga është me ndriçim dhe i riu nuk mbante asnjëherë armë me vete.
