Rama ndodhet në Kukës, në kuadër të turit që PS ka nisur për përzgjedhjen e kandidatëve për deputetë. Kreu i qeverisë, u zhvendos aty ku po ndërtohet aeroporti i Kukësit, ndërsa shpjegoi se pse PS po kërkon një mandat të tretë. Kryeministri u shpreh se aeroporti i Kukësit po bëhet realitet, dhe shumë shpejt do ketë linja ajrore që nuk i ka as Tirana dhe as Prishtina. Kreu i qeverisë tha se shumë kush ka rrezikuar në rrugën e Kombit, duke u kthyer në burim aksidentesh. E ndërsa sot realiteti është krejt tjetër. Ai shtoi më tej se është një ndryshim cilësor i standardeve, i mënyrës së të projektuarit dhe të ndërtuarit në çdo funksion të çdo kalimtari.
“Shumëkush pyet përse na duhet një mandat i tretë? Përse unë kërkoj së bashku me skuadrën time një mandat të tretë për PS? Kjo për një arsye të thjeshtë, sepse kthesa që kemi marrë dhe tani kemi hyrë thellë për të dalë në rrugën që e ngre Shqipërinë në një nivel tjetër nuk mund të zmbrapset, sot kur gjithçka ka filluar të marrë formë si ky aeroport. Përfytyroni sikur PS e lë në mes këtë punë, do të ndodhë në Shqipëri e njëjta gjë që ndodhi me rrugën e Kombit.
Shumë kush ka rrezikuar në rrugën e Kombit, ku u kthye në burim aksidentesh. Shikojeni sot çfarë po ndodh me rrugën e Kombit. Është një ndryshim cilësor i standardeve, i mënyrës së të projektuarit dhe të ndërtuarit në çdo funksion të çdo kalimtari.
Shikoni se sa vepra arti ka gjatë rrugës, mbikalime apo rrugë dytësore për të lidhur komunitetet deri dje të izoluara. Shikoni çfarë vepre e jashtëzakonshme historike është bërë.
Thonë aeroporti ishte gati, por nëse do të kishte gjysmë gati parafytyroni se sa herë do ta kishte inauguruar Saliu. Ishte një pistë e ndërtuar me bujari të madhe nga mbreti i Emirateve të Bashkuara dhe e asistuar këtu nga vetë princi i kurorës, por u ndërtua në atë kohë të ulur thjesht mjetet që sillnin ndihma për ata që u shpërngulën me dhunën e spastrimit etnik nga Kosova.
Nuk ishte një pistë që mund të shërbente si aeroport Kombëtar. Sot është një kantier i madh, në punë intensivisht. Pasi janë zgjidhur problemet me të gjitha banorët”.
Rama u shpreh gjithashtu se pas përfundimit të aeroportit të Kukësit, do të krijohen 1 mijë vende pune, përveç atyre gjatë fazës së ndërtimit të tij.
“Një ambicie shumë të madhe për ta kthyer Kukësin një pikë referimi, jo vetëm për banorët e Kukësit e kuksianët që do i sjell se s’bën të votojnë për PD, 120 vota do i ketë nga unë PD këtu, se do marr ata që janë tallur më shumë në Facebook-un tim, e po i nxjerrin një nga një, por edhe për të gjithë të tjerët, qoftë për banorët në Tiranë, Gjakovë, sepse do jetë një aeroport që do sigurojë linja të cilat nuk i ka e s’do i ketë as Tirana e as Prishtina.
Do sjellë vetëm si aeroport 1 mijë vende pune direkte, e mijëra vende pune të tjera që do krijohen si rrjedhojë e ndërtimit të aeroportit. Një euro e investuar në aeroport sjell 17-23 euro të tjera si rezultat i atij investimi”.
