Kryebashkiaku Erion Veliaj, nga sheshi ‘Nënë Tereza’ shpalli zyrtarisht kandidaturën për një tjetër mandat në Bashkinë e Tiranës. Ai shprehu falenderimet për të gjithë demokratët, që sot i janë bashkuar socialistëve në shesh, ndërkohë që Tiranën e cilësoi një vend në të cilin një çerr që shet fiq, mund të bëhet edhe kryebashkiak.
“Kam një falenderim të veçantë për të gjithë demokratët që kanë ardhur në shesh, ju falenderoj të gjithëve. E ndjej zemërimin tuaj. Mirëseerdhët në familjen tonë, ndjehuni si në shtëpi, faleminderit që na u bashkuat. Ky shesh ka emrin “Nënë Tereza”, dhe Nënë Tereza thotë bëjmë gjëra të vogla që kanë rëndësi të madhe. Siç thotë Nënë Tereza, ky qytet është themeluar me gjëra të vogla, por që kanë dashuri të madhe.
Në Tiranë kishte njerëz që nuk kishin njohje, por mua më dha një shanc. Një qytet ku edhe një çerr i vogël që shet fiq, mund të bëhet kryetar bashkie, është një qytet i mundësive falë PS-së. Pati shumë nga kundërshtarët tanë që para se të kryenin vetëvrasjen, pati diversion dhe thanë që Edi Rama dhe Veliaj nuk flasin.
Dëshpërimi duhet të jetë aq i madh, sa e vetmja shpresë që mund të kenë është që në të zihemi. Më vjen keq t’ju zhgënjej, por unë dhe Edi Rama jemi më të fortë se kurrë, më të bashkuar se kurrë të çojmë përpara Tiranën dhe ambicien tonë për Shqipërinë europiane”, tha Veliaj.
