Sikundër ishte njoftuar, tashmë ka nisur protesta e opozitës para Drejtorisë së Policisë. Një grup qytetarësh janë grumbulluar para godinës, ndërsa të tjerë protestues pritet të vijnë nga selia blu, së bashku me kreun e opozitës Lulzim Basha.
Qytetarët po protestojnë paqësisht para godinës, ndërkohë që kanë bllokuar qarkullimin e automjeteve. Ata kërkojnë të lirohen personat që u shoqëruan mbrëmjen e djeshme, gjatë protestës së dhunshme.
Ish-deputeti i PD-së, Ervin Salianji, tha në një prononcim për mediat se protestat do të vijnë duke u radikalizuar.
“Të gjithë protestat tona janë demokratike, dhe e djeshme ishte protestë demokratike, dhe jo në proporcion me dhunën e ushtruar nga policia. Por protestat do të vijnë duke u radikalizuar, sepse nuk mund të lejojmë instalimin e një diktature në vitin 2019”, ka thënë ai.
