Deputeti socialist, Rrahman Rraja, ka reaguar për ngjarjen e zbardhur sot nga Policia e Lezhës ku i përfshirë në grabitjen me armë ishte nipi i tij, Ramazan Rraja. Në një prononcim për “Faxnews”, deputeti tha se kishte tre muaj që nuk kishte folur me nipin e tij dhe se e dinte jashtë shtetit.
“Kam tre muaj që nuk kam asnjë kontakt, nuk e dija që ishte i përfshirë në këtë ngjarje. Unë e di se ai është jashtë shtetit”, është shprehur deputeti Rrahman Rraja. 28-vjeçari bashkë me dy persona të tjerë tentuan të rrëmbenin një person, dhe u futën në lokal me maska e të armatosur. Policia e Shtetit ka konfirmuar se menjëherë pas ngjarjes së ndodhur në 13 nëntor në Zejmen të Lezhës, Ramazan Raja dhe dy shokët e tij janë larguar nga Shqipëria.
Nipi i deputetit të PS-së, Ramazan Rraja dhe dy shokët e tij Roan Brahimi dhe Alesio Dobrozi, pas ngjarjes janë arratisur nga Shqipëria fillimisht në Itali, bën me dije “Abc news”. Më pas dyshohet se kanë shkuar në Dubai, ku ndodhen shumë figura të njohura të kërkuar nga drejtësia shqiptare.
