Avokati i njohur Spartak Ngjela komentoi arrestimin e kryebashkiakut të Lushjes Fatos Tushe dhe 10 zyrtarëve të lartë, teksa deklaroi se SPAK po fillon të godasë personat që kanë lidhje me pushtetin. Deklarata e tij, u bë ditën e sotme në një intervistë për emisionin ”Breaking” në Top Channel.
Sipas Ngjelës, ky është vetëm fillimi dhe SPAK do të veprojë edhe për politikanët apo zyrtarët nga e djathta shqiptare, teksa shtoi se në krye të operacioneve qendrojnë Shtetet e Bashkuara të Amerikës.
Spartak Ngjela: “Duken shenjat që SPAK po godet majtas, të shohim se kjo është lufta anti-korrupsion. Kjo është skemë e nxjerrë nga Napoleon Bonaparti, kur frenoi terrorin në Francë, i ra majtas, se ai dhe revolucioni ishin majtas. Duke thënë se nuk është me tendencë, pastaj i ra dhe të djathtëve, i bëri copë dhe ata. Kur janë të inkriminuar të dy palët, e fillojnë nga ata që janë në pushtet. Se nga fillojnë e dinë ekspertiza, as gazetarët as juristët, askush nuk e di përveç kriminalistëve. Pse nuk e bëri revolucionin Meta me Saliun? Ne presim revolucioni të vijë në qendër, ne s’na intereson Lushnja. Këtë luftë e drejton FBI, ne jemi nën drejtimin e tyre. Por krimi duhet goditur me të dhëna, se pastaj gjykata të thotë je i pafajshëm. SHBA e drejton SPAK-un. Deri në Fier nuk kanë prekur ish-kryeministrat, pastaj kryeqendra e krimit është nga Vlora në Sarandë, aty kanë futur duart. Deri në Fier këta do thonë është gënjeshtër, kur të vejë në Vlorë, do maten mirë, se aty është një nga qendrat. Flas për bregdetin, korrupsioni është shpërndarë kudo”.
Kryebashkiaku Fatos Tushe dhe 10 bashkëpunëtorë të tij janë arrestuar nga SPAK, pasi janë të përfshirë në një tender abuziv të ditëve të fundit, prej 24 mln lekë për rehabilitimin e kanalit ujitës.
Tushes i janë vënë prangat në zyrën e tij, e ndërsa nga sa është mësuar deri më tani kreu i këti grupi ishte Flamur Peqini, kreu i Ndërmarrjes së Pasurive Publike dhe njëherazi ish- kreu i Inspektoratit të Ndërtimit në Lushnje.
Favorizimi i një kompanie për rehabilitimin e një kanali vaditës në Lushnjë me vlerë 24 mln lekë, duket se është bërë shkak i akuzave për kryebashkiakun Tushe.
