Avokati i njohur, Spartak Ngjela ka deklaruar se presidenti Ilir Meta dënohet me burgim të përjetshëm në rast se ndërmerr vendimin për të shpërndarë Parlamentin.
“Nëse do të shkarkohet le ta lërë me kaq, nëse do të dënohet me burgim të përjetshëm le të vazhdojë nuk ka asnjë pikë në kushtetutë të shpërndajë parlamentin, përveç dy rasteve. Nëse bën një dekret jashtë kompetencave quhet i pavlefshëm dhe nuk e shqyrton askush”, tha Ngjela.
Sa i përket nismës së Partisë Socialiste për të shkarkuar presidenti Meta, Ngjela ka sqaruar proceduarën që ndiqet në këtë rast, për të cilën tha se “nuk ka njeri t’i rezistojë këtij kalvari”.
“35 deputetë duhet të paraqesin kërkesën për shkarkim, parlamenti ia drejton komisionit te ligjeve i cili thërret Presidentin dhe e merr në pyetje, parlamenti mblidhet dhe thërret presidentin në dëgjesë më pas formulon një komision hetimor parlamentar, i cili zgjat deri në 3 muaj dhe thërret Presidentin sa herë të dojë. Komisioni i kthen raportin Kuvendit, i cili e voton me 94 vota. Më pas i shkon gjykatës kushtetuese për verifikim. Nuk ka njeri t’i rezistojë këtij kalvari. Niksoni dha dorëheqjen. Është tre muaj kalvar. Deri sa të vijë votimi në Parlament, Meta është President”, shtoi Ngjela.
