Pas ngjarjes së ndodhur në gjimnazin e Shupenzës, ku 60 nxënës u asfiksuan nga rrjedhja e gazit, ka reaguar kryetari i Partisë Demokratike Lulzim Basha. Duke iu uruar shërim sa më të shpejtë, Basha shprehet se po e ndjek nga afër gjendjen e nxënësve.
“Po ndjek nga afër gjendjen e nxënësve te gjimnazit të Shupenzës, të asfiksuar në orën e mësimit nga gazi karbonik. Duke ju uruar shërim sa më të shpejtë të rinjve që po marrin mjekim në Bulqizë dhe Peshkopi si dhe për nxënësen e sjellë në Tiranë në gjendje më kritike se të tjerët, shpreh keqardhjen dhe revoltën për pasigurinë e ambienteve që vënë në rrezik shëndetin e nxënësve në shkolla”, shkruan kreu i PD-së në profilin e tij në “Facebook”.
Sipas tij, investimet në shkolla nuk mund të bëhen pjesë e babëzisë qeveritare qendrore apo lokale. “Deputeti i Partisë Demokratike, Xhemal Gjunkshi, ndodhet në Dibër për të qenë pranë nxënëseve dhe familjarëve të tyre dhe për të marrë informacion të detajuar mbi përgjegjësit e asfiksimit të 60 nxënësve të Shupenzës”, shprehet Basha.
