Zëdhënësi i Presidentit, Tedi Blushi, ka reaguar pas deklaratave të ndërkombëtarëve në Tiranë në lidhje me Gjykatën Kushtetuese. Këta të fundit thanë se vendi duhet t’i drejtohet Komisionit të Venecias për zgjidhjen e ngërçit në ngritjen e Kushtetueses.
Përmes një postimi në Facebook, Blushi thekson se nuk ndalon asnjë ambasador t’i drejtohet këtij Komisioni. Sipas tij, ligji dhe Kushtetuesja e kanë të shkruar qartë se Presidenti nuk mund të bëjë 2 emërime të menjëhershme në këtë institucion.
“Por Presidenti nuk i ndalon ata t’i drejtohen vetë Komisionit të Venecias e ta pyesin: Kush është me e rëndësishme, Kushtetuta e Shqipërisë apo Dvorani i Partisë?”, shkruhet më tej në postin e tij.
Presidenti bën lëvizjen e rradhës: Ju tregoj për çfarë duhet bërë Referendumi
Postimi i plotë:
Presidenti Meta nuk ndalon asnjë ambasador të bëhet qesharak dhe karagjoz duke hyrë në debate juridike që nuk ekzistojnë, pasi Kushtetuta dhe ligji për Gjykatën Kushtetuese e kanë të shkruar qartë dhe prerë se Presidenti s’mund të bëjë dy emërime të menjëhershme në Gjykatën Kushtetuese.
Por Presidenti nuk i ndalon ata t’i drejtohen vetë Komisionit të Venecias e ta pyesin: Kush është me e rëndësishme, Kushtetuta e Shqipërisë apo Dvorani i Partisë?
Ndërsa Presidenti ka një pyetje për këta dhunues të çdo norme diplomatike dhe Konvente: A i keni marrë leje Kryetarit të shtetit tuaj kur hyni në lojrat e grupit të strukturuar diplomatik për të diskutuar dekretet e Kryetarit të një shteti që e ka shpallur Pavarësinë që në vitin 1912?!
