Bota

Nga kamerat dhe përgjimi, tek spiunët në rrugë: Si Kina përgjon qytetarët e saj

               Publikuar në : 12:15 - 09/05/19 S.N

Vendi komunist, po ndërton prej kohësh një sistem të madh të mbikëqyrjes së çdo njërit prej 1.4 miliardë qytetarëve kineze. Format e survejimit, janë nga më të larmishmet, dhe përdorimi i teknologjisë më të fundit është në plan të parë, pa harruar edhe metodat tradicionale që shohin të angazhuar në rrugë miliona spiunë. Ja cilat janë 10 mënyrat e mbikëqyrjes dhe mbajtjes nën kontroll të vendit me popullsinë më të madhe në botë.

  1. Përdorimi i teknologjinë e njohjes së fytyrës, që përzgjedh njerëz të caktuar nga turma

Të paktën 16 qytete dhe provinca në të gjithë Kinën, kanë filluar tashmë të përdorin një sistem kamerash të njohjes së fytyrës, që mund të skanojë popullatën e përgjithshme me një saktësi prej 99.8 për qind. Ky proces, është provuar të jetë i efektshëm. Policia në Nançang në Kinën Juglindore, arriti të gjejë dhe arrestoj një të dyshuar të kërkuar në një koncert ku merrnin pjesë mbi 60.000 persona.

  1. Administratorët e forumeve të ndryshme, udhëzohen se si të spiunojnë anëtarët

Në Kinë, qytetarët mund të paditen penalisht, për përmbajtjen e postuar në çdo forum në rrjet. Madje ligjet prekin edhe aplikacionet private dhe të koduara, siç është WhatsApp. Qeveria kineze u kërkon kompanive të teknologjisë, të monitorojnë dhe mbajnë regjistrat e bisedave për 6 muaj, dhe të raportojnë tek autoritetet çdo veprimtari të paligjshme.

  1. Qytetarët detyrohet të shkarkojnë në celularët e tyre, aplikacione që i lejojnë qeverisë të monitorojë fotot dhe videot që mbajnë

Qeveria ka detyruar ujgurët, një pakicë etnike në Kinën Perëndimore, të shkarkojnë një aplikacion që skanon fotot, videot, audiot, librat elektronikë dhe dokumente të tjera. Aplikacioni, i quajtur “Jingwang” në gjuhën kineze, do të thotë “pastrimi i internetit”, nxjerr informacione duke përfshirë numrin, modelin e telefonit, dhe të gjitha të dhënat që përmban.

  1. Autoritet mbikëqyrin se çfarë blejnë njerëzit online

Kompania e njohur Alibaba, ka pranuar se sistemi opsional i kreditit “Zhima (Sezam), i klasifikon përdoruesit në bazë të aktivitetit të tyre online. Drejtuesi i programi, Li Yingyun, tha se njerëzit që luajnë video-lojëra për 10 orë në ditë, cilësohen “persona të papunë”, ndërkohë që ata që blejnë pelena online, kanë më shumë të ngjarë të kenë një ndjenjë përgjegjësie, pasi mund të jenë prindër.

  1. Policët civilë mbajnë syze të veçanta, për të identifikuar njerëzit e kërkuar në vende të populluara, si rrugët dhe stacionet e trenave.

Syzet speciale që arrijnë të njohin një fytyrë të caktuar, të cilat u prezantuan në fillim të këtij viti, janë të lidhura me një bazë të dhënash, që bën në kohë reale krahasimin e një fotoje të marrë në çast, me foton e një personi të shpallur në kërkim për ndonjë krim. Vu Fei, drejtori ekzekutiv i Teknologjisë LLVision, që prodhoi këto lloj syzesh, thotë se teknologjia e tij mund të identifikojë fytyrat nga një bazë të dhënash prej 10.000 fotosh në vetëm 0.1 sekonda.

  1. Instalimi i “policisë robotike” në stacionet e trenit, që skanon fytyrat e njerëzve, dhe i krahason me ato të personave në kërkim.

Një polic robot, është vendosur në formë eksperiment në Zhengzhou të Kinës Qendrore. Thuhet se ai është në gjendje të monitorojë cilësinë e ajrit, dhe të lokalizojë zjarret e rëna aty pranë.

  1. Përdorimi i teknologjisë së njohjes së fytyrës, për të gjurmuar kalimtarët që shkelin rregullat e qarkullimit

Disa qytete kineze, kanë instaluar kamerat e njohjes së fytyrës nëpër rrugët e tyre. Ato skanojnë fytyrat e kalimtarëve në një bazë të dhënash të policisë qendrore. Fotot dhe emrat e kundravajtësve, shfaqen në një ekran të madh pranë rrugës. Më pas policia, i kontakton dhe u tërheq vërejtje, ose u vendos gjobë.

  1. Ndalimi i këmbësorëve në mënyrë rastësore, për të kontrolluar telefonat e tyre.

Policë të armatosur dhe të forcave paraushtarake në Xinjiang, një territor në Kinën Perëndimore i banuar nga minoriteti ujgur, i ndalojnë këmbësorët e rastit për t’u kontrolluar telefonat dhe laptopë e tyre për aplikacione të ndaluara, apo mesazhe që konsiderohen të rrezikshme për Partisë Komuniste të Kinës. Kjo metodë ka çuar tashmë në arrestimin dhe burgimin e shumë ujgurëve.

  1. Përgjimi i postimeve në mediat sociale, që mund të lidhen me familjen dhe vendndodhjen e përdoruesit

Një grua në Vuji, Kinën lindore, mori një telefonatë nga policia pasi djali i saj, Shon Zhang, ripostoi një postim kundër presidenti Xi Jinping, nga llogaria e tij në platformën kineze Weibo në mars. Policia i tha nënës së Zhang, se postimi nuk ishte i mirë, dhe kërkoi që ai të hiqej menjëherë.

  1. Ndërtimi i një softueri parashikues, që bazuar në të dhënat e mbledhura për njerëzit pa dijeninë e tyre, sinjalizon ata që mund të jenë problematike apo kërcënues për qeverinë

Programi grumbullon të dhëna nga kamerat CCTV, sistemet që përgjojnë rrjetet WiFi, dhe dekodojnë të dhënat që transmetohen nëpërmjet tyre. Sistemi qendror, i njohur edhe si “Platforma e Integruar e Operacioneve të Përbashkëta” (IJOP), i analizon më pas profilet e njerëzve, duke parashikuar nëse ata mund të dëmtojnë regjimin komunist kinez, dhe njofton autoritetet lokale për rebelët e mundshëm./ Tirana Today

Kthehu
WhatsApp Denonco ne TT