Kryeministri Edi Rama është shprehur se duke filluar nga dita e hënë do të ketë një hapje tërësore, me përjashtim të vetëm disa aktiviteteve.
Përmes një komunikimi live me qytetarët në Facebook, Rama sqaroi se transporti publik, aktivitetet sportive në vende të mbyllura dhe aktivitetet kulturore do të vijojnë të jenë të mbyllura.
Kreu i qeverisë paralajmëroi se ekspozimi do të jetë shumë i madh, sidomos me baret dhe restorantet.
“Vijon të lexoj sojin e papërgjegjshëm, që ky është grip, që kjo është kot, nuk ka asgjë, njëri sot, shkruante se po tani, po bëhet për protestat. Këto broçkulla ju lutem ti lëmë, ti referohemi shkencës dhe burimeve zyrtare të informacionit. Të mos merremi me llafe, që janë hapur të gjithë.
Ne nga e hëna përveç transportit publik, aktiviteteve sportive dhe kulturore në mjedise të mbyllura nuk do të ketë asgjë mbyllur. Hiq transportin publik, që është problemi i madh në këto kushte, por nuk e hapim ende. Hiq edhe baret dhe restorantet në mjedise të mbyllura, palestra, teatro, kinema, club-e nate apo lokale lodrash për fëmijë, gjithë tjetër do të jetë e hapur. Ekspozimi do të jetë shumë i madh, sidomos me baret dhe restorantet”, tha ai.
