Ditën e sotme në New York është raportuar viktima më e vogël, që humb jetën nga një gjendje e rrallë inflamatore, e cila besohet të jetë e lidhur me koronavirusin.
Përmes një konference shtypi, guvernatori Andrew Cuomo tha vetëm se bëhet fjalë për një 5-vjecar, duke mos dhënë më detaje të tjera.
Mjekët në Spitalin e fëmijëve “Mount Sinai Kravis”, vend ku vogëlushi ishte i shtruar pasi ishte infektuar me koronavirus, konfirmuan vdekjen, por as ata nuk dhanë ndonjë informacion shtesë.
“Rritja e numrit të rasteve është duke sfiduar bindjet e mëparshme se fëmijët janë më pak të rrezikuar nga COVID-19. Ndonëse është e rrallë, ne po shohim disa raste kur fëmijët e prekur me koronavirus, mund të sëmurën me simptoma të ngjashme me sëmundjen Kawasaki ose sindromën toksike të shokut, gjë e cila shkakton inflamacion në enët e tyre të gjakut”, tha Guvernatori Cuomo.
Ndërkaq, janë duke u bërë përpjekje për të mbledhur informacion mbi çrregullimin, e quajtur “Sindroma inflomator, i Multi-Sistemit Pediatrik, i lidhur potencialisht me COVID-19”.
Departamenti i Shëndetit në New York lëshoi alarmin, duke u bërë thirrje spitaleve që nëse hasen me një rast të tillë, të raportonin në departament.
Rastet e sëmundjeve inflamatore të rralla dhe të rrezikshme për jetën e fëmijëve të infektuar me COVID-19, u raportuan për herë të parë në Britani, Itali dhe Spanjë. Sipas ekspertëve, ky çrregullim mund të sulmojë organe të ndryshme në trupin e fëmijëve, kryesisht zemrën.
