Të hënën, KQZ do të zëvendësojë gjashtë deputetë të tjerë të opozitës. Tre prej tyre vijnë nga lista e Partisë Demokratike. Në Berat, Astrit Veliaj do të zëvendësohet nga Lefter Maliqi. Në Korçë, Klevis Balliu do të zëvendësohet nga Ligoraq Karamelo. Ndërsa mandatin e Gent Strazimirit do ta marrë Majlinda Halilaj.
Sipas Komisionit Qendror të Zgjedhjeve, në datën 1 mars Majlinda Halilaj ka paraqitur dorëheqjen nga marrja e mandatit, por tre ditë më pas, ka ndryshuar mendje, duke dorëzuar në KQZ formularin e dekriminalizimit, për të nisur procedurën e marrjes së mandatit.
Sa i përket LSI, mandatin e Viktor Tushaj në Lezhë e merr Alda Hoti. Në Durrës, mandatin e Nora Malaj e merr Edlira Hyseni, dhe në Gjirokastër në vend të Vangjel Tavos e merr Ediola Braha.
Deputetët e rinj pritet të betohen në seancën plenare të datës 13 Mars, duke e çuar në këtë mënyrë në 10 numrin e mandateve të asaj që cilësohet si opozita e re parlamentare në vend.
Në mbledhjen e radhës, KQZ do të regjistrojë katër parti politike si pjesëmarrëse në zgjedhjet për pushtetin vendor. Bëhet fjalë për: Partia Uniteti Kombëtar, Partia Socialiste e Moderuar, Partia Emigracioni Shqiptar, dhe Partia Kombëtare Konservatore Albania. Në këtë mënyrë, pas së hënës në Kuvend do të ketë 92 deputetë.
