Tashmë janë hedhur dritë mbi emrat e dy personave, me të cilët po pinte kafen avokati që u ekzekutua mbrëmjen e djeshme, Ravik Gurra.
Sipas informacioneve, njëri prej tyre është juristi i Bashkisë Elbasan, Arben Hoxha si dhe Astrit Telhallari, miq të përbashkët mes tyre.
Ata janë marrë në pyetje si dëshmitarët kyç të vrasjes së avokatit Ravik Gurra, baba i dy vajzave që studiojnë në Londër.
Ende nuk ka asnjë pistë ku të jetë i orientuar hetimi paraprak.
Profili i avokatit
Ravik Gurra, 50-vjeç, ishte i njohur në sistemin e drejtësisë, pasi ka qenë mbrojtës ligjor i shumë personazheve, nga fisi Çapja ku ishte kryesor, te dosja e Emiljano Shullazit, si avokat i dytë, por edhe shumë çështje të tjera në Elbasan dhe në Tiranë.
Gurra ka mbrojtur edhe dy vëllezërit Hysa, Agron dhe Kujtim Hysa, pronarët e firmës “Vëllezërit Hysa”, të akuzuar për abuzime në ndërtimin e rrugës Elbasan-Gjinar. Ata u arrestuan së bashku me dy ish-drejtorë të ARRSH-së, Andi Toma dhe Dashamir Xhika.
Avokati njihet edhe si mbrojtës i gjyqtarit Petrit Ceno, një nga 3 gjyqtarët që u përfshinë në skandalin e biletave për “El Classico”.
Gurra po ashtu ka qenë edhe avokat i “Hakmarrjes për Drejtësi”. Ai kishte mbaruar fakultetin e drejtësisë në Tiranë, ndërsa më pas në 1998 emigroi në Angli ku ndoqi disa kurse dhe specializime për avokaturën. Gjatë qëndrimit në Angli, ai ka punuar edhe në sistemin e emigracionit si përkthyes, pasi e zotëronte mjaft mirë gjuhën.
Viktima ishte i divorcuar
Ravik Gurra ishte baba i dy vajzave, i divorcuar nga familja që jeton në Londër, ai jetonte mes Anglisë dhe Elbasanit, ku kishte nënën dhe ushtronte profesionin.
Gurra kishte një karrierë gati 10-vjeçare si avokat.
