Pasditen e sotme është marrë një vendim të rëndësishëm për çeljen e negociatave të anëtarësimit me Shqipërinë dhe Maqedoninë. Me një shumicë dërrmuese votash ky parlamenti Holandez ka vendosur të mos japë rekomandimin për çeljen e negociatave.
Deputetët holandez janë shprehur në të njëjtën linjë se “rezultatet e Shqipërisë janë të pamjaftueshme për të ndërmarrë një hap të tillë”. Të njëjtat burime thanë se kanë qenë rreth 125 vota kundër Shqipërisë dhe vetëm 20 pro hapjes së negociatave të anëtarësimit.
Vendimi nuk ishte i papritur, pasi Holanda e kishte paralajmëruar në muajt e fundit, ndërsa edhe sot ministri i Jashtëm deklaroi se Shqipëria nuk është gati, pasi ka probleme me krimin dhe korrupsionin.
“Ne kemi shqetësime serioze në lidhje me luftën kundër korrupsionit dhe krimit të organizuar. Më shumë përparime duhet të bëhen në këto pika” tha ministri i Jashtëm Stef Blok, para votimit të mocionit në parlament. Ndërsa disa nga deputetët janë shprehur ndër të tjera ‘Shqipëria nuk ka përmbushur 5 prioritetet. Nuk ka të dhëna të sakta për krimin e organizuar. Ka probleme me të dhënat e luftës ndaj korrupsionit’.
