Kryetari i Kuvendit, Gramoz Ruçi ka reaguar në lidhje me hapjen e negociatave për Shqipërinë dhe Maqedoninë e Veriut.
Ruçi ka përshëndetur vendimin e Këshillit të Ministrave të BE-së, teksa thekson se kjo është një ngjarje historike për Shqipërinë.
“Ky vendim është një ngjarje e madhe historike për Shqipërinë, Maqedoninë e Veriut dhe gjithë rajonin. Është një vendim i rëndësishëm edhe për vetë Bashkimin Evropian. Është një vendim i merituar për Shqipërinë, që rikonfirmon se trashëgimia, rrënjët, kultura dhe aspiratat tona kanë prodhuar e konsoliduar vlerat tona evropiane.
Kuvendi i Shqipërisë është krenar për kontributin dhe legjitimitetin që i dha këtij procesi të gjatë e të vështirë, që më në fund gjeti mbështetjen dhe konsensusin e të gjitha vendeve anëtare. Shpreh mirënjohjen dhe vlerësimin tim për të gjithë protagonistët dhe kontribuuesit në këtë sukses kombëtar. Tashmë Shqipëria jonë hodhi një hap të rëndësishëm drejt konfirmimit si një vlerë e bashkuar e Bashkimit Evropian”, tha Ruçi.
