Gjatë fjalës së tij në Komisionin për Punët e Jashtme të Parlamentit Europian, komisioneri Johannes Hahn ka thënë se në muajin maj, Komisioni Europian do të rekomandojë hapjen e negociatave për Shqipërinë dhe Maqedoninë e Veriut.
“Bashkimi Europian duhet të fokusohet në perspektivën afatgjatë të vendeve kandidate. Në Komision, në fund të majit do të prezantojmë progres-raportet për vendet e rajonit (Ballkani Perëndimor), plus Turqinë.
Pres që mbi bazat e asaj që kemi parë, të bëjmë një rekomandim pozitiv për hapjen e negociatave të anëtarësimit me Maqedoninë dhe Shqipërinë”, ka thënë ai.
Pavarësisht situatës kaotike me klasën politike shqiptare, Hahn thotë se progresi është i dukshëm. Ai ka shtuar se ndonëse janë bërë edhe hapa pas, në periudhën afatgjatë është bërë progres i rëndësishëm.
“Në Ballkanin Perëndimor është bërë një progres shumë i rëndësishëm. Në afatgjatë, kur shohim arritjet, është e vërtetë që ka edhe hapa pas, por në afatgjatë vërejmë progres shumë të rëndësishëm në ekonomi, në sundimin e ligjit apo në procesin e ripajtimit”.
