Ministrja e Shëndetësisë, Ogerta Manastirliu, ka publikuar mesazhin e mjekes Silva Bala, e cila iu rikujton qytetarëve se duhet të dëgjojnë këshillat e mjekëve, dhe jo të veprojnë sipas dëshirës së tyre.
Nëse mjeku specialist mendon se qytetari duhet ti drejtohet spitalit, pasi në kushtet e shtëpisë nuk mund të vijojë mjekimi, kjo këshillë duhet zbatuar. Mjekja, duke marrë shkas nga rastet kur qytetarët nuk binden, kërkon që të mirëkuptojnë bluzat e bardha, pasi çdo neglizhencë do u kushtojë jetën. Po kështu një thirrje e fortë vjen edhe për mbajtjen e maskës, për të mbrojtur veten dhe komunitetin ku jeton.
“Ju lutem bashkëqytetarë të mi. Tregoni kujdes për shëndetin tuaj. Shëndeti është gjëja më e çmuar që ka njeriu. Nëse ju drejtoheni tek mjeku i familjes, nëse ju drejtoheni tek mjeku specialist dhe mjeku ju thotë se ju jeni për të vajtur për t’u trajtuar në spital, mos e neglizhoni këtë rekomandim të mjekut.
Drejtohuni sa më parë qendrave spitalore, në kohën që mjeku mendon se ju nuk mundet të vazhdoni më të mjekoheni në shtëpi. Në shtëpi mjekohet sëmundja e lehtë.
Mjeku kur mendon se sëmundja është e patrajtueshme në shtëpi, patjetër dhe është e domosdoshme që trajtimi të bëhet në qendrat spitalore, pranë kujdesin spitalor nën trajtim të kontrolluar me ekzaminime dhe në ndjekje të vazhdueshme të gjendjes suaj.
Neglizhenca më e vogël ju kushton jetën! Ju lutem edhe njëherë: Sa herë që të dilni nga shtëpia, mos e harroni maskën. Bëjeni maskën sendin tuaj më të domosdoshëm. Maska është pjesë e trupit tuaj tashmë, për t’ju mbrojtur nga ky virus i rrezikshëm”.
