Astrit Patozi ka treguar se cili është synimi që ka partia e re, “Bindja Demokratike”.
I ftuar në emisionin “Opinion”, Patozi deklaron se më këtë parti qytetarët do kërkojnë të mos i binden kryeministrit apo kryetarit të parties, ndërsa kur u pyet për të shkuarën dhe rolin që kanë luajtur themeluesit e kësaj partie si pjesë e PD-së, ai tha se secili është i gatshëm të marrë përsipër përgjegjësitë.
Më tej, Patozi u shpreh se gëzon resepkt maksimal për deputeten demokrate, Rudina Hajdari, duke e cilësuar “talent politik”.
“Me zonjën Hajdari kam folur për çështje të tjera dhe për këtë, kam respekt maksimal. Është një lloj talenti. Talent politik do të thotë njeri që merr qëndrime dhe vendime të duhura. Për mua është e tillë. Ne kemi diskutuar për këtë projekt, ajo ishte shumë e prirur dhe e ka thënë në parlament që opozita ta marrë pjesë në zgjedhje. Me PD ajo s’ka lidhje”.
Sa i përket lidhjes së tij me Partinë Demokratike, ai tha se: “Unë kam keqardhje për shtëpinë time të dikurshme politike që është katandisur në atë nivel. Por unë s’kam mundësi, kam humbur çdo lloj interesi për atë parti. E kam thënë vetë që me atë parti nuk më lidh asgjë”.
Ndërkohë, Patozi tregon se ka bashkëpunuar dy herë me kryeministrin Rama.
“Unë me Edi Ramën kam bashkëpunuar me dy raste. Para tre katër ditësh, shkova bëra check –up. Kam bashkëpunuar dhe njëherë tjetër, i vetmi rast kur e kam takuar zotin Rama. E kam takuar para disa viteve, kemi qenë ulur në një tavolinë. Unë kam pirë kafe të shkurtër dhe ujë pa gaz, ai nuk e di se çfarë ka pirë. Në atë tavolinë ka qenë Sali Berisha, Ilir Meta, Gramoz Ruçi dhe Shpëtim Idrizi”, tha Patozi.
