Në shtëpinë ku Asdrit Kapaj vinte shumë rrallë, jeton nëna e tij, që as nuk dëgjon e as flet. I vëllai Nexhipi thotë se çdo gjë e kanë ngritur me djersë dhe s’kanë marrë kurrë parà nga ato që i kanë dëgjuar në medie si grabitjet e bujshme të sportistëve të famshëm.
Nëna e tij 74-vjeçare, Shega nuk e di ende ngjarjen që ka habitur të madh e të vogël në Gjorm. Ajo mendon se kanë ardhur për ta ndihmuar me dokumente për të shkuar te djali më i vogël, Asdriti, në Angli. Vëllai i madh, që i ka rritur të gjithë pas vdekjes së babait, nuk mund ta besojë se grabitësi është i vëllai.
Asdrit Kapaj ishte mjeshtër në çaktivizimin e kamerave të sigurisë. 42-vjeçari nga Gjormi, që ishte arrestuar në muajin shkurt pas një kërkimi 10-vjeçar, ka pranuar në gjykatë 22 plaçkitjet e banesave disa milionë stërlinëshe të njerëzve të pasur dhe të famshëm në Wimbledon të Londrës.
Babai i dy fëmijëve, Asdrit Kapaj banonte në Manchester, ndërkohë që udhëtonte rreth 200 milje në jug drejt Londrës për të kryer plaçkitjet, mes të cilave edhe shtëpitë e ish-legjendës së tenisit, Boris Becker, dhe ish-futbollistit të Arsenalit dhe kombëtares franceze, Anelka, shkruan Top Channel.
Pronari i dyqanit të peshkut dhe babai i dy fëmijëve, pranoi vjedhjet me vlerë 550,000 paund në harkun e 10 vjetëve. Por, prokurorët kanë frikë se vjedhjet e tij arrijnë në miliona paund, duke vlerësuar se ai mund të ketë vjedhur 200 shtëpi që nga viti 2008.
Një grup i madh banorësh shkuan pranë gjykatës për të festuar arrestimin e tij duke thënë se tani flinin të qetë. “The Sun” shkruan sot se vjedhjet e tij mund të kenë nisur në korrik 2008 deri në shkurt të këtij viti kur edhe u arrestua.
“Scotland Yard” e ka lidhur më parë, “Hajdutin e Wimbledon”, me 200 vjedhje, por prokuroria nuk e akuzon për një numër të tillë. Duke veshur një kapelë peshkatarësh, Kapaj u akuzua për shkatërrimin e sistemit të kamerave të sigurisë, dhe mund të ketë përdorur pinca të posaçme për të hapur dyert e apartamenteve.
Ai gjithashtu thuhet se është pikasur nga pronarët e shtëpive disa herë. Në një rast, thuhet se ishte ndjekur nëpër një kopsht nga futbollisti francez Anelka, i cili ka luajtur për një sërë ekipesh të Premier League duke përfshirë Chelsean dhe Arsenalin.
Kapaj, i cili u paraqit në gjykatë duke veshur një palë tuta ngjyrë vjollcë, u arrestua në paraburgim. Banorët e fshatit Wimbledon, përfshirë viktimat 81-vjeçare Philippa Beck, ishin në gjykatë për të festuar arrestimin e tij.
Zonja Beck, e cila ishte pronare orëve të arit, tha se ishte tronditur kur mësoi se hajduti po bënte një udhëtim vajtje-ardhje gati 500 milje për të grabitur në zonë. Motivi i tij, siç sugjeroi ajo, nuk mund të jetë thjesht për para.
