Prokuroria ka dhënë masën e sigurisë “Arrest me burg” për 15 të arrestuarit, lidhur me protestën e opozitës, ndërsa ka liruar 5 të tjerë. Për këta të fundit, Gjykata vendosi masën “Arrest shtëpie” për 4 nga të arrestuarit dhe “Detyrim paraqitje” për një tjetër.
Mësohet se disa nga të arrestuarit janë Florenc Hoxha, Naim Haxhiu, Emnauel Nallbani, Andon Gjini, Resul Daci, Suzana Dimushi, David Linati, Hasan Jakupi, Ilir Hamedini, Festim Taku, Sajmir Rexhepi, Mitat Fieraku, Lefter Jakupi, Ndue Tuci, Pëllumb Sheluka, Veljan Dine.
Por, asnjë prej tyre nuk e ka pranuar akuzën, teksa kanë thënë se kanë qenë në protestë por nuk kanë kryer akte të dhunshme. Edhe avokati i të arrestuarve, Ivi Kaso pretendon se ndaj të pandehurve nuk ka vepër penale dhe arrestimet janë politike:
“Të lirohen të arrestuarit pasi nuk kanë kryer asnjë veprim të dhunshëm, aktet kanë qenë simbolike”.
Arrestimi i tyre u bë në bazë të pamjeve filmike të policisë, ndërsa të pandehurit akuzohen për veprat penale “Kundërshtimi i punonjësit të policisë së rendit publik”, “Goditje për shkak të detyrës”, “Shkatërrimi i pronës” dhe “Prishja e qetësisë publike”.
