Në pritje të nisjes së Asamblesë së Partisë Socialiste, shumë figura të kësaj partie kanë mbërritur në selinë rozë.
Të pyetur nga gazetarët e pranishëm, asnjë nga socialistët nuk ka konfirmuar një post të ardhshëm në qeverinë “Rama 2”.
I përfolur për postin e kreut të Kuvendit, Gramoz Ruçi tha vetëm dy fjalë për median: Prisni mbledhjen!
I ngjashëm ka qenë edhe komenti i Taulant Ballës, teksa i pyetur nëse do bëhej ministër, tha: Duroni edhe pak!
Ministrja Mirela Kumbaro ka zgjedhur të mos flasë për mediat, ndërsa Asamblesë i është bashkuar edhe Spartak Braho, i cili ka qenë pjesë e LSI-së, por në zgjedhjet e fundit parlamentare ishte kandidat për deputet në listën e PS.
Jashtë dyerve të selisë rozë, Braho tha: “Jemi ftuar për të marrë pjesë. Të shohim çfarë do na thotë Rama”.
Kryeministri Rama ka paralajmëruar se do të ketë shkurtim të numrit të ministrive, ndërsa ende nuk ka asnjë emër të konfirmuar për qeverinë e re.
