Nga Shkodra, ku zhvilloi një takim me kryetaren në detyrë të Bashkisë, Voltana Ademin, kryedemokrati Basha ka pohuar se për asnjë arsye nuk do të ulej në një tryezë me kryeministrin Rama, për pandeminë. Basha tha për gazetarët se ai dhe PD nuk kanë bërë politikë me pandeminë.
Ai iu rikthye edhe një herë propozimeve të bëra nga ana e opozitës, në lidhje me situatën me koronavirusin në vend. Sipas tij, nëse qeveria do të kishte dëgjuar këto propozime, situata nuk do të kishte marrë këtë rrjedhë.
“Për asnjë ditë të vetme, PD dhe unë nuk kemi bërë politikë me pandeminë. Jemi të parët që kemi propozuar planin. Është e qartë se ata që kanë përgjegjësinë për të ndihmuar njerëzit, nuk po bëjnë këtë. Por duan të heqin vëmendjen nga pandemia. Unë kurrë politikën nuk e kam parë si qëllim në vetvete, mendoj se edhe në opozitë mund tu shërbejnë njerëzve.
Por të na kishin dëgjuar, të jeni të sigurtë se edhe gjendja e infeksioneve nuk do ishte kështu. Për rrjedhojë edhe numri i të sëmurëve. Gjendja nuk përballet duke u fshehur pas gishtit.
Të gjithë e dimë që numri i atyre që humbin jetën në spitale, por edhe jashtë është shumë i madh. Të shkunden nga propaganda. Pyetja që shtroj sot është edhe sa njerëz duhet të vdesin dhe sëmuren?”, përfundoi Basha.
