Vajza që shihni në foto quhet Blerta Dervishi dhe deri më sot ishte punonjëse e policisë pranë Repartit “Shqiponja” në Policinë e Tiranës.
Dje, për të mbrojtur banesën e saj pranë shkollës “Petro Nini”, Dervishi kundërshtoi efektivët e policisë si dhe punonjësit e Përmbarimit për 6 orë me radhë.
Sot, ajo ka marrë lajmin se është pezulluar nga detyra, me motivacionin se ka penguar punonjësit e policisë në ushtrimin e detyrës.
Konflikti i djeshëm ndodhi mes banorëve dhe forcave të policisë dhe punonjësve të përmbarimit, pasi banorët kundërshtuan prishjen e banesave, duke u përplasur fizikisht.
Pamjet janë transmetuar live në të gjitha mediat, ndërsa në një moment është vënë re Dervishi teksa i hoqi nga dora njërit prej banorëve, një sëpatë që mbante në dorë pas portës së hekurit, duke shmangur në çdo moment përshkallëzimin e situatës në dhunë.
Dje me urdhër të ministrit të Brendshëm Sandër Lleshaj, u lirua nga detyra edhe drejtori i Policisë së Tiranës, Kastriot Skënderi ndërsa vendin e tij e mori përkohësisht zv.drejtori Dhimitraq Ziu. Ministri kritikoi efektivët për punë jo efikase.
