Kreu i Urgjencës Kombëtare, Skënder Brataj, i bën thirrje qytetarëve që të respektojnë masat e distancimit fizik.
Në një prononcim për A2 CNN, Brataj tha se mosrespektimi i masave po sjell rritjen e numrit të rasteve të reja.
“Kjo është gjëja më absurde që po ndodh në këtë vend, ndërkohë që e gjithë bota është në këtë situatë, ashtu si edhe Ballkani. Njerëzit duhet ta marrin vesh një herë e mirë, nuk bëhet shaka me virusin, sepse po shkakton pacientë, viktima, po infekton njësoj si më parë”, tha ai.
Brataj paralajmëron se gjatë muajit korrik do të ketë një përkeqësim të situatës dhe rritje të mëtejshme të numrit të rasteve.
“Ky rezultat që shohim tani është pasojë e muajit maj, pasojat e qershorit do t’i shohim në korrik. Zbatoni rregullat”, shtoi ai.
Ai u bën thirrje qytetarëve t’i përshtaten sjelljeve të reja, ndërsa bizneset të respektojnë të gjitha masat mbrojtëse.
