Në një nga qendrat e votimit në Elbasan, votohet poshtë kamerave. Bëhet fjalë për qendrën e votimit në gjimnazin “Dhaskal Todri”, ku zgjedhësit votojnë nën kamerat e sigurisë të vendosura mbi kutitë e fshehta.
Pamjet janë publikuar nga ish-deputeti i PD-së në Elbasan, Endri Hasa i cili shprehet se nga kamerat lexohet vota e çdo qytetari, ndërsa shton se po përdoret çdo lloj instrumenti për të shantazhuar votuesit.
“Kamera për te lexuar votat! Edhe pse votohet vetëm me një parti dhe vetëm me një kandidat, edhe pse votuesit, vëzhguesit, komisionerët, numëruesit i ka vetëm Rilindja prapë se prap po përdoret çdo instrument për të shantazhuar votuesit. Janë nxjerrë në terren bandat, drejtorët, policia dhe çdo funksionar tjetër për të shtuar figurantët. Por dhe kaq nuk i mjafton dhe nga frika se askush nuk po bindet për tu bërë pjese e farsës se pushtetit te Edi Ramës, kane vendosur dhomat e fshehta poshtë kamerave ne shkoll, kopshte dhe kudo munden në Elbasan dhe në gjithë Shqipërinë. Çdo vote po regjistrohet dhe te monitorohet qe te çojnë deri ne fund vullnetin e Partisë! Asgjë nuk ka ndryshuar! Vete votojnë, vetë numërojnë, vetë shpallin rezultatin”, shkruan ish-deputeti Hasa.
