Gjermani i fundit iku në 28 apo 29 nëntor? Teksa debati për datën e Çlirimit është i vjetër, kjo dilemë nuk ka kursyer as politikanët, si edhe historianët. Të djathtët festojnë si Ditën e Çlirimit dhe Pavarësisë 28 nëntorin. Ndërkohë për të majtët dita e Çlirimit është data 29 nëntor.
Por, çfarë mendojnë qytetarët? Tirana Today pyeti disa prej tyre se cilën konsiderojnë ata si datën e Çlirimit të Shqipërisë. Dhe ashtu si ndarja që ekziston në radhët e elitës së vendit, edhe shqiptarët kanë opinione të ndryshme.
“Për mua është data 29, sepse atëherë ka ikur dhe pushtuesi i fundit.Gjithmonë kemi festuar datën 29 si ditën e Çlirimit dhe Pavarësisë.”
“Çlirimi i Shqipërisë është bërë në datën 29. Tani babai im ka luftuar dhe ata vetë na e kanë thënë. Kurse i ati i Lulit nuk ka qenë, ai hante petulla. Edhe ndaj këta vijnë e thonë për datën 28 Nëntor.”
“Për mua nuk kanë ndryshim, mjafton që jemi të pavarur dhe të lirë. Si në 28 apo në 29 të jetë çliruar Shqipëria.”
“28 apo 29 Nëntor, kjo është një lojë e ndyrë politike. Është gjëja më e poshtër që i bëhet popullit, duke i vënë ballë për ballë. Nga i kërkoni ju përgjigjet, nga politikanët? E si mund të vendosin ata, njerëzit më injorant. Për mua si popull data e çlirimit është 28 Nëntor.”
“Është 29 Nëntori, dita kur iku dhe gjermani i fundit. Ndërsa sa i takon debatit në është 28 apo 29, mendoj se bëhet fjalë veç për një lojë politike. I intereson politikisht atyre që kanë qenë bashkëpunëtorë të fashizmit.”
Por, edhe pse të ndarë në mendime, duket se vendosja e një date të saktë nuk ka shumë rëndësi për shqiptarët. Pasi me flamuj në duar dhe me bluzat me shqiponjë, mjafton që 28 dhe 29 Nnëntori janë ditë për të festuar. TIRANA TODAY
