Një ditë më parë, Kuvendi votoi ndryshimet Kushtetuese për Reformën Zgjedhore. Me anë të një postimi në rrjetin social Facebook, ka reaguar politikani gjerman, anëtar i Parlamentit Europian dhe zëdhënës për Punët e Jashtme i Partive Popullore Europiane, Michael Gahler.
Ai shkruan se është për të ardhur keq, dhe e dyshimtë që partia “qeverisëse e Shqipërisë theu konsensusin e arritur ndërkombëtarisht me opozitën, dhe dje ndryshoi në mënyrë të njëanshme Kushtetutën”. Ndër të tjera ai shkruan se nuk mund të jetë e pranueshme për askënd që qeveria Rama, të nisë të ndryshojë në mënyrë arbitrare rregullat e lojës elektorale.
Postimi i plotë:
“Për ata miq të Facebook që kanë një interes të veçantë në Shqipëri:
Unë e gjykoj shumë me keqardhje dhe si të diskutueshëm në lidhje me qëllimet e tyre të vërteta që partia qeverisëse e Shqipërisë, theu konsensusin e arritur ndërkombëtarisht me opozitën dhe dje ndryshoi në mënyrë të njëanshme Kushtetutën.
Nuk mund të jetë e pranueshme për askënd që qeveria Rama e cila dëshiron negociatat e pranimit me BE, të nisë të ndryshojë në mënyrë arbitrare rregullat e lojës elektorale.
Nëse kjo qeveri dëshiron me ndershmëri negociatat e pranimit me BE, si mund të mos pranojnë këshillat e Parlamentit Evropian, Komisionit Evropian dhe shteteve anëtare përkatëse për një çështje kaq të ndjeshme dhe themelore për demokracinë.
Grupi i PPE do të vëzhgojë me kujdes veprimet e ardhshme në lidhje me kodin zgjedhor dhe do të nxisë me forcë që të arrihet konsensusi me opozitën brenda Këshillit Politik.
Varet nga partitë dhe shqiptarët të mbrojnë demokracinë dhe perspektivën e tyre evropiane”.
